要數過去10年國際球壇最佳教練，真係好難選擇，好似費格遜同摩連奴咁，獲獎之多理應最有機會當選。不過，根據國際足球歷史及統計協會（IFFHS）最新公佈，從01年到家，成為最佳教練嘅係阿仙奴領隊雲格（圖），呢位法國教頭統計積分上都高過費Sir同摩帥。論獎項，雲格肯定唔夠佢嘅兩位老對手多，所以點樣計分得出呢個結果，真係只有呢個協會先知。不過，大戰曼城前夕有喜訊，對兵工廠嚟講，點都係好事。