幾位老友在蘇豪區吃私房西餐，飲智利紅酒，冇資格飲拉菲，因大陸同胞猛飲，周圍搜購，拉菲價錢高升，根據一位紅酒專家老友張總講嘅酒質與價位比較，拉菲已經去到n+1倍，除非將「炫耀」貼上一個價錢牌，點計都係唔值得。范伯倫（ThorsteinVeblen）在1899年出版一本書TheTheoryoftheLeisureClass，提出一個名詞conspicuousconsumption（炫耀性消費），係指啲新發財、富豪階級鍾意高級、高價消費，以突顯自己有錢有地位，與一般平民不同，呢個名詞百年來流行不衰，我地只要見吓啲高貴女士係要突出巴黎米蘭最新名牌時裝，用名牌手袋……睇《蘋果》名人娛樂版影相，寫明某某小姐嘅「行頭過百萬元」，就知道一二。出街食餐飯，駛乜成身俾人睇得到嘅物品竟然係價錢超過一百萬呀？呢啲就係炫耀性消費啦，內地同胞只不過係後來居上，變本加厲啫。
基金F指出，內地人民嘅消費力究竟有幾大，值得研究。根據採訪報導，內地貪污風氣猖獗，貪官當道，富庶地區嘅，教師校長亦收禮收到手軟，在此情況下，貪污所得其實係一種經濟學上之「轉移付款」transferpayment，由農民、家長、商人之手轉入貪官之手，但係總數其實不變。但在轉移過程中，農民、小戶手中之一萬幾千轉入貪官之口袋，貪官收收埋埋就有幾十萬，幾百萬可用，商人一方面行賄，一方面得到好處，於是十三億人民之儲蓄有一部份流入幾千萬人之口袋。基金Ｆ提醒我地，人民之「消費傾向」不同（propensitytoconsume），人民得幾萬元身家，使錢要慳啲慳啲，貪官好易取得一億，使錢就成為大花筒，一個鎮長都可以到澳門賭場輸掉一億元啦。咁講法，大量金錢化零為整，流入消費傾向甚大之少數人嘅荷包，於是形成咗中國人消費非常豪氣嘅現象，如彭博通訊社話，十一黃金周之中，大陸客來港用一百萬港元買一隻錶，面不改容，所以香港商業區租金僅次於曼赫頓第五大道！