Joele極斯意

Crown的士確是好坐舒服，但坐了幾十年都有啲悶，羨慕其他城市有Benz、Doblo及標致！不過唔使恨，內櫳豪華闊落的倫敦的士已進駐香港，外形典雅，伸隻手截車做乘客特別有詩意，連做司機都變得特別斯文呢！

記者：徐影龍
攝影：黃子偉
Model：Hazel@GMEModels

極力子偏軟　易搵磨擦點

呢架倫敦的配5速棍波，當然要試車兜番轉。坐上司機位，空間比想像中窄，高佬或大隻佬會有啲頂腳。入波開車，極力子高但偏軟，磨擦點好易搵，對棍波生疏咗都無咁易死火。扭力算OK，起步不過不失，基本上三千轉前已要轉波，再谷高轉數都係得個嘈字，叠埋心水斯斯文文咁揸好過。視野廣闊良好，就算車頭稍長都好易睇位。最正就係上快速公路，行順咗掂住油門Keep住5波，車身夠穩夠定，揸同坐都好舒服。咁都啱嘅，倫敦的士要好優雅咁行，唔通似有啲Local的士佬咁，燈都唔打就踩油爬頭咁無品咩！

圓燈加鵝冠　英式情懷

中國吉利車廠正式收購LondonTaxi公司，於國內設生產線生產這款倫敦的士，富利堡率先引入到港，仲有齊紅黑白三種色，連電油版及石油氣版都齊備。我剛於曼徹斯特巧遇過這款倫敦的士，今次近距離慢慢望清楚，於香港街道上行駛又幾鶴立雞群。座艙高調突出，帶點舊款Mini般的英式風味。直立式鬼面罩、兩旁圓圓頭燈、指揮燈同霧燈鼎足而立，加上頭頂的「鵝冠」及高高鼓起的鐵皮軨，整體感覺好地道好親切。

1.標準只配鐵皮軨，若當私家車用多會配襯條型軨落去。

2.直立式鬼面罩充滿氣派，圓潤及直線配合得好好看。

3.「鵝冠」未駁燈號，暫只作裝飾用。

中排隱藏　尾排闊得驚人

揸完一段路，除發現國產貨不會爆炸外，內櫳仲好豪華舒適，一排三個位的座椅，莫講話長腿Model唔頂腳，就算姚明坐一樣好闊落。超過三個人點算呢？其實中排可放兩張凳落嚟，不過座椅細啲兼反方向，適合小朋友多啲。
乘坐感尚算舒服，但在港人眼中，實在有不少搞笑位！好似前後座椅之間隔住透明膠板，只留下一個細小缺口作畀車費及找續之用，縱使烏鼠都未驚過。另外，前座不設乘客位，騰出空間來放行李，再於門邊加條繩，畀司機拉道門返嚟，咁嘅「自動閂門」設計認真夠晒Raw。
倫敦的士暫只作私家車售賣，睇吓市場反應先決定會否投身的士界，若你有興趣買番部，要留意只有棍波版，以及司機位隔籬不設乘客位。

■最體貼是附有斜台設計，輪椅、BB車、手推車上落更方便。

■車身高、地台低，乘客出入都唔怕撼頭。

■除電油版，石油氣版亦已到港，但未知有幾慳氣。

■駕駛艙有大量仿桃木裝飾，惟膠感仍稍嫌偏重。

■極力子適中而波棍衝程頗長，即是叫你輕輕鬆鬆慢慢揸。

■中間大大塊防盜膠板，只留個細窿作找續之用。

■必要時可放多兩張凳落嚟，不過就變成坐對頭車。

LondonTaxi規格

引擎：2,378cc直四
馬力：112kw/5,500rpm
扭力：212Nm/4,000rpm
傳動：5速手動波箱
售價：$298,000
查詢：28776700（富利堡）