"呢條魚我最鍾意"
學兩位喺本報有地盤、極具人氣嘅股壇專家話齋，市況暢旺最怕你走貨後，心魔同自尊心作祟，永遠唔肯喺高於沽出價再入市，卻眼巴巴見被你拋棄嘅愛股破晒位回氣係咁上，只有搥胸頓足之痛。賭波同買股票一樣，要回報足，宜踢走心魔找尋值博率，不要場場賭熱門同盲目捧愛隊；上周我擂台亦狠心試捧鯨魚對家、主場嘅冷門天鵝，結果愛隊果然輸波，但輸到1:4真係始料不及，但賭波贏錢不能有太傷感感覺。
一周踢一場，今次鯨魚作客級數較低嘅勝利船，賠率更熱；雖然仲喺日聯榜首拋離幾遠，但唔能夠鬆懈，質素超群只嫌反覆，作客從來係大勝大敗，對手主場戰績平庸，隻「船」同隻「鳥」，我早認定喺日聯極渣，今次要反手再捧鯨魚W，博埋2:1，3:1波膽，望食多注，呢條鯨魚點都堅過颶風鮎魚。
"朗尼續約未必好事"
感情係雙向，不應勉強對方下去，懂放手祝對方好運更美好。賓主關係就算情同父子如雲格栽培法比加斯，也總會有分開一天，廠迷也不會過份傷感。朗尼同當年高價撬佢嘅費格遜決裂，之後又「變臉」續約5年，唔知魔迷有何感受，不過千萬唔好太天真，以為兩人會和好如初，因為始終有條刺喺度。
費Sir今次處理恰當，朗尼想出走，我認為係靡爛私生活被揭發大有關係，一個十多歲已成名嘅波牛遇到大挫折覺得好冇面，懂知錯想離開去尋找新生活亦沒有對曼聯不住。大家一起曾經快樂過，成功過，就算他日真的分手祝朗尼好運便是；然後各自再衝刺，再闖高峯！不過曼聯今周作客史篤城，負面新聞剛過不久，加上作客成日失波，有貝碧復出，擁躉都未係時候感情用事。
"粒「糖」破位可再上"
放兩日假，除咗同生日快樂嘅母親大人，加埋成家人一齊食餐開心嘅最重要外，入戲院睇老友米雪推介嘅「告白」加埋喺屋企「現在」、「畸寶」兩遙控狂㩒就爽咯。家每月交成6百蚊月費，希望度好啲波，幫補吓使費已心足。禮拜六晚早場，熱刺迎愛華頓，前者周中場波，眾主力拼盡大部份時間踢10個輸3:4；學身邊好友睇圖度股票，愛華頓兩連捷確認升勢，兩位主力卡希爾同阿迪達有態，加埋中堅菲臘積基爾卡好似攞緊飛躍進步獎咁，熱刺聯賽表現其實好反覆，揸定宗旨，熱門有疑問，「愛」冷W啦。
"法比仔代韋仔博爆"
法比仔周中出番，兼同替身韋舒亞（明日停賽）踢「雙控中」，阿仙奴即大開殺戒，對手弱，雲格敢玩嘢；明日作客冒起中嘅曼城，我認為莊家開初盤曼城熱唔透，呢場同我上周重點推介黑池一樣，冷W加入球「大」保險啲；曼城未在發揮最佳水準，嘜得住佢哋兩隻翼，阿仙奴由法比仔單獨領軍又唔會龜縮，可博爆。
語錄：哺喺電視機旁睇直播一向都係上佳娛樂，一條熱冷過關W鯨魚射愛華頓，希望今日過得愉快。