隔牆有耳:林鄭縛樹令 玩死民政專員 - 李八方

隔牆有耳:林鄭縛樹令 玩死民政專員 - 李八方

傳說中嘅李氏力場威力驚人,連官府都要寫個服字。原本來勢洶洶,卻喺最後關頭轉向,難為一眾高官連續兩日大鑼大鼓開記者會,呼籲市民做好防風措施,點知最終風平浪靜,好似乜都冇發生,搞到唔少官員噚日下午鬼咁得閒,因為大家以為要應付颱風而取消約會,點知鮎魚冇吹到埋嚟,大家偷得浮生。

狂發電郵到有關部門

不過並唔係所有官員都有半日安,好多地區民政專員就打到嚟咁唔得閒,八方聽聞林鄭局長轄下嘅樹木辦,為免又因為冧樹搞出意外而被抨擊,一連兩日都狂發電郵去各大有份管理樹木嘅部門,千叮萬囑叫佢哋記緊派人加固樹木,鎖又好縛又好,總之唔好再有意外,樹木辦嚴陣以待鮎魚,可能比天文台台長李本瀅更緊張。
民政事務總署及十八區民政專員多得樹木辦唔少,呢兩日慘遭樹木辦疲勞式轟炸,不過上頭有令,都要發散人去縛好大樹,點知搞完一輪得個桔,冇被鮎魚吹襲,反被樹木辦玩死。