現年57歲的曾志偉雖已婚有子女，但先後與關淑怡和藍潔瑛等女星傳緋聞，他每次都四両撥千斤，輕輕帶過。他現年30歲的兒子曾國祥可算繼承了父親的風流，曾國祥早前被爆一腳踏幾船，背着拍拖9年的女友偷食，被揭連環速食o靚模A.Lin、理大校花蔡瑩瑩（Ivy）和洪天明舊愛梁郁霖（Lillian），曾國祥卻無力招架，最終要老竇出言拆招。
見過兒子女友
對於兒子大籮緋聞，志偉不褒不貶，他認為緋聞與知名度掛鈎，志偉說：「緋聞最大壓力係嚟自傳媒，我同個仔講，冇人寫就證明你唔紅，新聞嘅嘢一單冚一單，人哋嗰單咁咪要跳樓。」
曾國祥早前被爆一腳踏四船，志偉即過招給兒子：「我叫佢去跳樓o架，佢唔跳即係冇事啦。」志偉直認兒子帶過現任女友見家長，他說：「我對佢識女朋友嘅態度好free，佢帶嚟畀我見，我咪同佢sayhi，個個我都認真對待，我咪好麻煩，唔知下次又係唔係呢個。」
志偉不介意兒子不停換畫，他說：「我對子女結識男女朋友，百分百自由，另一半又唔係同我住，佢鍾意咪得。」若一天兒子跟志偉說性向有變，愛男不愛女又怎辦？志偉抵死說：「如果佢變咗鍾意男人，我會拍晒手，咁咪慳番唔使擺酒，總之佢鍾意乜就乜。」
兩父子異口同聲表示對彼此所有花邊新聞有協議，志偉說：「我哋有協議過，如果有雜誌報道一啲新聞出嚟，大家冇立即通電話，就證明單料係假。我唔想成條街知晒，我都蒙在鼓裏，唔通我做老竇都唔知個仔啲嘢嘅真相咩。」果然薑是老的辣，當志偉一輪笑訓時，不擅詞令的曾國祥只得默默細聽，全程會心微笑。