置地舉辦嘅慈善接力賽「鼠戰中環」星期日舉行，民主黨涂謹申、李永達今年有參加，為慈善組織「思健」籌款，呢個比賽要求參加者扮鬼扮馬，穿越中環多幢商廈同行人天橋。
高達同阿涂分別扮蝙蝠俠同羅賓，兩人噚日試裝，着住戰衣亮相，在立法會嚇親唔少人。
高達話自己未試過有咁堅挺嘅胸肌同腹肌，照鏡都覺得自己有型，八方覺得阿涂個羅賓造型都幾搶鏡，事關漫畫、電影中，羅賓好少高過蝙蝠俠。
兩個人扮超人參賽，高達話要表達做超人都唔一定要賺到盡，亦可以劫富濟貧。黃毓民見到兩人扮鬼扮馬，話如果真係咁夠薑，應該學似社民連咁喺議會內發威，唔好得個樣。