養兒一百歲，長憂九十九，曾志偉深明箇中，某天兒子曾國祥對他說愛上電影，要加入影圈。志偉擔心兒子只是一時心癢，但也尊重讓他入行止痕，這一卻孕育了曾國祥首部執導的電影《戀人絮語》，父子水銀燈下合作，兒子還安排志偉飾演風流父親。曾國祥憑該片角逐台灣金馬獎最佳新導演，志偉坦言兒子得獎與否都感到驕傲，下一步是等傳媒給自己新朵──曾志偉，曾國祥的爸爸！ 撰文：比華利
《戀人絮語》上映日期：11月25日
夫妻同心，其利斷金，父子同心，效果更甚。熱愛電影的曾志偉有子繼承衣鉢，現年30歲的二子曾國祥近年幕前幕後兩邊跑，儲夠本錢即與另一名導演尹志文執導電影《戀人絮語》，他和尹志文更憑該片提名下月舉行的台灣金馬獎最佳新導演獎，兒子有此成績，一向避提「老」字的志偉也破戒說句：「我真係老懷安慰。」曾國祥首執導演筒開拍《戀》片，為了讓老父見證這歷史一刻，特別安排他客串演出。
曾國祥傾慕同學母親
曾國祥和曾志偉日前一起接受本報專訪，曾國祥說：「我首次執導，好想阿爸參與，不過全套戲多個愛情故事，男、女主角都好年輕，只得其中一個單戀故事個阿爸角色最啱佢，所以安排咗佢去演風流成性嘅阿爸。」志偉立即抵死答嘴：「我做番自己。」既然搵得阿爸助陣，曾國祥為何又不找胞姊曾寶儀幫一把？曾國祥解釋：「怕搵埋家姐，套戲變得太過一家人。」
向來緋聞多多的曾國祥，哪段故事是他親身經歷？他尷尬說：「當中有好多身邊朋友故事，冇話邊個特別講自己，當中都滲有我嘅經歷，我小學時試過傾慕同學個阿媽，當時我大約七、八歲，去到同學屋企，我見到佢阿媽會好怕醜，其實我相信呢個經驗，好多男仔都試過。」
父子兵團在片場開工，志偉表示放下了父親身份，非常尊重兒子的任何安排，曾國祥說：「佢好接受我嘅意見，又好守時，一啲都冇對我嘅指導唔滿意。」離開片場，志偉馬上生猛晒，寸嘴火速回歸，他說：「去到片場梗係聽晒導演指示，佢叫我着住底褲拍就着住底褲，可惜佢冇安排我拍床戲，冇嘢益老竇。」
那倒不如叫兒子稍後再開拍一部3D《肉蒲團》，到時明正言順讓父親擔正，志偉聞言搞笑說：「唔使咁激，佢開套《父子》得o架啦，我做番城城（郭富城）嘅角色，好似有楊采妮同林熙蕾呢啲女主角都夠，記得部戲有好多場床戲，希望個仔關照吓老竇囉，再下套或者可以開《色，戒》，我就梗係做梁朝偉啦。」
志偉：電影差必割凳
兒子執導，擁有豐富拍攝經驗的志偉當然有拿出錦囊相贈，他收起笑臉認真說：「我只係叫佢要快啲拍，唔好得個講，我同佢講片名改《戀人絮語》冇人明o架，畀我就會改叫做《九戀錯》，呢個名商業啲。」
志偉不諱言欣賞新晉導演心中的一團火，他說：「新導演好多火，佢哋社會經驗唔多，拍吓拍吓會不自覺冇咗自己，變得好世故，遲啲會變得好巿儈，到時回頭睇自己第一部執導嘅戲，先會見番真正嘅自己。」
《戀》片名副其實是志偉的「乖孫」，但該片下月才在港上映，他自然期望「乖孫」受人稱讚，但如果他質地不好，做爺爺的絕不會畀面，會訓示一餐，志偉說：「我同其他觀眾一樣，如果套戲唔好睇，我一樣會割凳、掟番茄o架。」不過，曾國祥近日憑《戀》片角逐台灣金馬獎的最佳新導演，過得評審一關，證明已獲認同，難怪志偉表示無論兒子得獎與否都會開心，他說：「大家對佢認同，證明我呢個包袱（指兒子長成）今日終於可以放低，作為父母，佢食咗我幾十年飯，條友家識行，我梗係開心。」
笑言父子講金不講心
雖然兒子才華得到肯定，但志偉堅持對他出力不出錢，他說：「我畀錢佢開戲就唔馨香，如果10部都係我攞錢畀佢拍，咁就真係死得，如果佢可以過五關斬六將先得嘅機會，人哋畀錢佢拍，呢啲機會先難得。」曾國祥也不想靠父蔭，他說：「我同老竇一早有共識，好怕靠佢先可以開到戲。」
這次父子檔拍戲，曾國祥可有要父親減片酬？志偉笑言兩父子講金不講心，他說：「我梗係要收，不過佢都未畀錢我，我等佢票房大收，到時我諗住分佢一半。」
故事簡介：男女覓愛大混亂
電影《戀人絮語》集合多個愛情故事，當中包括了相戀、暗戀、單戀、失戀、熱戀和苦戀，每個故事的人物又絲絲緊扣，當中故事有曾志偉瞞着太太包二奶，卻不知兒子的一位老死已向太太展開暗媾大計。在洗衣店工作的謝安琪，從拿來清洗的衫褲中細味俊男客人彭于晏的點滴，日日睹物思人。舊情人陳奕迅和林嘉欣雖已各有伴侶，卻忍不住偷情，陳奕迅的現任女友范曉萱得悉後不禁向林嘉欣的男友告密……
