各位芒亨迷終於等到喇！PSP版芒亨3（MonsterHunterPortable3rd）終於落實12月1日推出，好心急想玩其實都唔使等到12月嘅，芒亨3已經推出體驗版，不過就需要輸入密碼先可下載，不過我哋今日就預備咗100個體驗版密碼給《蘋果》讀者，等大家搶先屠龍！
記者：許福合
攝影：林栢鈞
Model：Hailey@PureModels
行版詳情
香港行版芒亨3定於12月1日推出，售價$328，當中仲會附送72頁全彩說明書，而且仲係中文及日文各一本，唔怕唔識睇啦！
最過癮仲係送張MHP3rd屏幕清潔貼，唔用嘅時候可以吸住PSP機身，大小仲與PSP機背個圓圈一樣，勁方便。
Michael
芒亨發燒級玩家兼專家，由第一代芒亨就忠情此作品，基本上任何武器到佢手，都能熟練自如，強項弱點如數家珍。
體驗版遲到
這隻芒亨3體驗版，剛在星期三放出來讓玩家下載，不過因為比原定嘅時間遲咗，結果香港Capcom這天電話就一直響個不停，玩家狂追問究竟幾點可以下載；最後在當日下午4點先至上架，不過因為大量玩家同時下載嘅關係，體驗版才141MB，但最低消費都要成個鐘先至可以下載完成！
入到遊戲，會見到有體驗版嘅字樣，任務就只提供初級同上級，初級就係羅亞魯德羅斯，地點係孤島，而上級係亞種波爾波洛斯，場地係凍土，任務時間為20分鐘。我哋搵咗由第一集芒亨就開始玩嘅專家Michael試玩，佢就覺怪物嘅難度同以往分別不大，不過需要有唔同技巧，反而遇上獨行怪要注意，容易被佢難倒。
可連線對戰
武器方面，芒亨Fans熟悉嘅武器都用得番，而且仲見到可以變形嘅斬擊斧（斧刀），雖然感覺上打起嚟鈍鈍哋，不過特別在於有兩種形態，在斧形時攻擊力很大，而轉到劍形時命中率就比較高，亦比較容易打出連擊，但要花時掌握距離。
另外仲要一提，今集可以帶兩隻輔助貓，絕對係打怪好幫手！體驗版內已經提供有2至4人連線合作，適合用嚟挑戰難度較高嘅上級任務；可惜體驗版玩唔到新增嘅優克摩村，防具等能力值都未能睇到，不過睇討論區玩家評語，基本上都一致期待正式版推出！
Profile
主機：PSP
類型：動作
廠商：CAPCOM
連線人數：2至4人
推出日期：12月1日
遊戲售價：$328
送100個體驗版
作為芒亨Fans，點可以唔試呢隻體驗版，我哋今日就預備咗100個體驗版密碼送出。只要答中以下問題，將答案連同回郵信封寄往：將軍澳郵箱65264號，信封面請註明「《蘋果日報》MonsterHunter3rd」，便有機會得到。遊戲獎品先到先得。（如有任何爭議，最終決議權歸CapcomAsia，《蘋果日報》概不負責。）
問題：到網上《蘋果網睇片》，片段最後出現多少部PSP呢？