郭家大事日日新鮮，劇力媲美《巾幗梟雄之義海豪情》，阿媽話信託基金受益人係水哥嘅家人，水哥認為佢仍然有份，近日又質疑股份安排唔清唔楚，佢兩個仔名下實際有冇新地股份，令人疑惑。
水哥咁多疑問，阿媽噚日終於回應，透過新地發言人表示，有關家族信託基金重組嘅事，一切以10月初發出嘅新聞稿為準，當日所講嘅嘢，至今仍然有效，維持不變。
郭老太聲明短短兩行字，絕不長氣，八方理解，即係話身家已分，大仔嘅家人係基金受益人，至於大仔係唔係受益人，當日咁寫就係咁寫，今次都冇補充，總之大家心中有數。中國人傳統閂埋門教仔，出新聞稿交代家事，好戲怕且陸續有來。