大城市總係有啲疑幻疑真嘅傳說，香港乜都有，十幾廿年前狐仙出沒轟動一時，早前有人聲稱目擊UFO都幾哄動，近日最多人講嘅都市異象，就係被指可以左右颱風動向嘅一股超自然力量李氏力場。
被形容係超強颱風嘅鮎魚，一直來勢洶洶，有直撲香港之勢，點知原來只係姿態，臨門一腳轉彎，路徑轉變。雖則天有不測之風雲，不過天文台都不敢輕視，台長李本瀅原定今日同傳媒飯局，但面對李氏力場強力發功，台長要留守崗位，突然取消飯局約會。
網民話劏鮎魚祭旗
外界一直有個睇法，就係天文台台長雖然係李本瀅，不過掛幾多號風球嘅話事權，卻在另一位李先生手上，今次鮎魚轉向唔吹嚟香港，無數網民認定又係李氏力場發揮作用嘅結果，因此即使天文台幾日前預測鮎魚會吹正香港，個颱風最終都行歪咗，搞到天文台唔會掛八號風球。鮎魚滑不留手，難怪李台長都捉唔到路。
鮎魚唔嚟香港，轉向北上，呢個戲劇性嘅路線移動，究竟李氏力場起咗幾多作用呢？八方無從揣測，不過facebook上李氏力場個群組，加入者越來越多，噚晚突破13,000人，係咪反映小市民寧可信其有盲目迷信呢？大家自行判斷。
李氏力場威力無窮，有人甚至開始膜拜呢股神秘力量，周末已安排節目嘅人，竟然齊齊祈求李氏力場全力將鮎魚拒諸門外。打唔成風，未來兩日假期唔會冇着落嘛，否則風球高高掛，浪費晒雙休日。一般打工仔好想鮎魚臨門，因為有機會多一日假期，家陣鮎魚離開，八方在facebook見到有人化悲憤為食慾，揚言要劏幾條鮎魚祭旗。
新版主禱文笑死人
如果香港真係有李氏力場，八方相信日出康城業主都希望股念力可以在將軍澳發功，阻隔堆填區烏煙瘴氣，李超人巡視日出康城時，不排除就係有力場護身，否則點會覺得心曠神怡？李氏力場無遠弗屆，新版主禱文不脛而走，在網上膾炙人口，「願李的國降臨，願李的旨意行在香港……因為住屋、電力、電話，全是李的，直到永遠。」
mailto:[email protected]