近期所見，只要文章中稍為點名提及嘅冧巴就會有人跟，見股價識郁才死跟喪炒係近期坊間小散戶採取嘅策略，投資講座撞口撞面就係聽到此起彼落議論紛紛邊個貼得準邊個又貼得唔準，總之冇人會諗吓背後究竟係靠自己基本因素抑或由幾多天時、地利、人和加以扶持。
近期唔少上市公司積極搵股評人食飯，就算你唔得閒食餐飯佢都想跟你見一面，唔敢講10間有幾多間係正正經經，不過個別就真係有心硬銷兼擺明洗腦，亦有新股飯局一坐低就好有與狼共舞嘅感覺。但係上得市股價又好哋哋搭好晒天地線，成個雞棚似模似樣，連所謂甚麼對冲、私募基金經理都肯落叠齊齊炒供求先至夠經典，上市前入股嘅又有，上市時借埋個朵畀你用又點話，最緊要有錢齊齊搵，一齊嘜個價上天。
咁嘅混濁情況之下，連港交所（388）「權益披露」都成為發掘即市貼士嘅黃金風水寶地，最緊要某某基金披露，按圖索驥，連間上市公司究竟賺緊幾多錢賣緊幾多件產品都懶理，前仆後繼慌死執輸，第四季係跑數嘅季節，首三季唔見有咩表現嘅分子紛紛發晒茅垃圾都掃返嚟，二仔底基金都焗跟，形成Rainmaker效應。
小心錯入龍門客棧
解構有關人等之揀貨條件，完全離不開「貨源歸邊」幾個大字，就算係之前已經輸死晒班老散嘅股份，都無任歡迎，因為散戶就算見隻累佢曾經輸到甩肺嘅衰股有得彈，都會基於童年陰影唔敢在該處跌低又往該處博起番身，就算手上仍有千年蟹貨，亦唔見得有幾大機會幫你翻身，殭屍翻生跳跳紮，慘得過一隻二隻背後都有同一堆人嘅手影，連市場上其他基金仔都跟埋一份，結果股價升勢一時無兩一發不可收拾。就係呢種景象，再次令小老散再次好了傷疤忘了痛，以為隻垃圾變寶藏。
總之，一句講晒，咁容易有人免費做你指路明燈，你都要睇清楚係唔係俾人帶你入龍門客棧，因住走唔番出嚟。
胡孟青
獨立股評人