巴布亞新幾內亞　扮泥鬼嚇人

今日活樂遊目的地——巴布亞新幾內亞，一聽到，所有人的反應都是「嘩！去到非洲咁遠呀。」哈哈，巴布亞不是非洲，近好多，但當地的風土人情山山水水，又真係幾非洲喎。

記者：蕭漢祥
攝影：陳陶鈞
Model：Christina&Jessica@StarzPeople
鳴謝：PNG資源控股

地理篇：澳洲樓上

先來個地理簡介：位於南半球的巴布亞新幾內亞（PapuaNewGuinea，簡稱PNG），是太平洋西南部的島嶼國家，鄰近印尼的巴布亞省，再易明啲，就係位於澳洲的北面。老實講，出發前對於這個地方真的全無認識，只是知道曾經發生天災、排華等事件，出發前也猶豫了一陣。今次遠赴的城市芒特哈根（MountHagen），位於PNG西邊近1,700米的高山之上，由首都莫爾茲比港（PortMoresby）坐內陸機到芒特哈根約個多小時機程。點解山長水遠要飛到咁遠咁高，而不留在沿海城市嘆世界？皆因要去探訪呢度聞名的Mudman。

■村民的Mudman造型真係一絲不苟，全身搽上白色粉末及戴上頭盔面具。好彩是日光日白，夜晚都真係會嚇親。

■導遊說村內的小朋友自小就要學習扮演Mudman，從而了解習俗的歷史。

■除下頭盔的泥人，可愛到暈。

故事篇：20磅面具醜死鬼

戴上泥黃色的頭盔，全身擦上白色粉末的Mudman泥人，正確點其實應該係泥鬼。起源於當地古時一個部落，一班戰士狩獵回來發現自己部落被敵對入侵，村民被趕走，婦女統統被帶走。為了從強大的敵人手中搶回失去的土地，拯救被帶走的村民，最終想出一個辦法──扮鬼。由於當時各個部落對神怪鬼魂之說十分害怕，於是就扮鬼扮馬，製作醜陋的頭盔面具，手指戴上削尖了的竹枝，於晚上靜靜進攻嚇走敵人。
當然時至今日再扮泥鬼只是演出，不單止嚇不倒人，戴上Mudman頭盔面具的小土人，簡直係可愛到暈。不過單看他們的表演，相信大家都估唔到這個嚇人的面具，重量完全唔講得笑，小記嘗試攞起，估計大約20磅重，當然小土人的頭盔會輕少少，但模特兒Christina舉起拍照幾十秒都舉到手震。

■Mudman演出，還包括示範鑽木取火，雖然試了兩次都失手兼手，但最終都不辱土人之名點着乾草。

■每逢節日，土人都會穿上色彩繽紛的裝扮，跳SingSing舞慶賀。

■女性土人頭上的飾物有雀鳥羽毛，還有綠色的甲蟲！

體驗篇：SingSing舞

今次來到芒特哈根市，一落機就遇到一大班土人在機場外熱烈歡迎，又唱歌又跳舞，仲有近百人圍觀，以為今次出巡咁有面子，但其實係同一班機載有PNG首相到訪，土人所跳的SingSing舞只係歡迎佢。雖然表錯情，我們也興致勃勃即刻舉機不停向這班色彩繽紛的土人拍照，很大鄉里出城。
據講，芒特哈根約75%的人口，是Melpa族人，亦稱為哈根人。一直以來他們都住在高山，直至1930年代歐洲人踏入此城，這個部族才開始與外界接觸。外國曾有研究說，Melpa族人習俗上會男女分開居住，成年男性住在圓錐形的房屋，成年女性和幼童就會住在長方形屋中。他們的官方語言除了Melpa語，還有一種類似英語為基礎的TokPisin，雖然我哋都係聽唔明……
探訪期間，Melpa族人還給我們展示他們原始的狩獵工具：弓箭、長矛和斧頭，以及示範古老的隱身狩獵術。我相信，在原始森林之內，土人的弓箭長矛隱身術分分鐘比AK47更危險。不過小記試過拉這種弓箭，雖不難拉，但如竹片般的弓弦好似很易會拉爛，搞到我不敢出全力。

■古老Melpa族人，展示隱身的狩獵技術！

■兩位模特兒試試傳統的狩獵工具，要射出弓箭當然有難度。

■村內小攤檔售賣Mudman紀念品。前排泥人頭盔約$30/個、後排泥人約$61/個

手信篇：咖啡豆一包

走遍芒特哈根，想掃街飲飲食食買手信，有點難度。在前往探訪土人的途上，卻見到處都是咖啡豆的種植，咦！咁咪隨手可以摘到咖啡果實，整杯免費咖啡囉！卻原來此時並非咖啡果實的成熟期，大部份果實仍未變為成熟的紅色，要儲夠一杯的咖啡豆真係要慢慢搜集。
對當地人而言，種植和搜集咖啡豆是生計之一，有搜集者會揸住農夫車到各地種植場，收集農民的收成。咖啡果實一般可以賣到約$4.2一公斤，比經過加工的咖啡豆少很多。導遊話因為當地人寧願搵快錢每次賺少些，不用做加工，舒服得多。我們參觀了當地一所工場看咖啡豆加工，烘烤、磨碎、入袋封口，兩三部機器就完成，很簡單，但價錢就差得遠，一公斤賣約$75，利潤高幾倍，這又一次說明「唔辛苦點得世間財」。