喺菲律賓人質慘劇中失去三名至親嘅梁太，堅強又有教養，兒子頌學在事件中重傷後，一直陪伴在側，令無數香港人動容，天主教教區湯漢主教都公開讚揚梁太係信徒嘅榜樣同埋見證。
前日屯門醫院醫療團隊開記者會，梁太寫咗封公開信多謝香港巿民，一開始就話自己一直祈禱，希望Jason大步檻過安然無恙，仲呼籲巿民唔使再籌款畀佢哋，佢財政冇困難，家陣最緊要係兒子平安康復，請大家為Jason祈禱。
公開信被cut短
一直有同梁太聯絡嘅一位神父，知道屯門醫院講Jason最新狀況都好留意電視台報道，點知睇CCTVB新聞睇到佢眼火爆，最嬲係TVB讀梁太封公開信時，竟然cut咗「繼續為Jason祈禱便已足夠」呢句話。神父同八方講，佢認為TVB隨便刪剪公開信，係唔尊重梁太嘅意願，同ATV、有線新聞原汁原味比較，TVB做法差得遠。
神父好勞氣，大彈CCTVB「做得好差」、是是但但，不過八方就勸神父息怒，皆因天主應該好大方，唔會同CCTVB計較。