現年49歲嘅劉德華，入行30年，不論外貌或演技，佢對自己要求都好高，早前佢仲承認因貪靚喺受傷嘅鼻樑疤痕上打美白針，華仔日前喺台灣接受徐熙娣（小S）主持嘅節目《康熙來了》訪問，講到從影至今，先後拍過逾百部電影，但99年同日籍女星石田光、瞿穎、黃磊、黃秋生同黃百鳴拍嘅《愛情夢幻號》就令佢留下一點遺憾。
上船才覺受騙
雖然套戲為華仔荷包帶嚟千萬酬金，但當佢上郵輪去加勒比海外景時，竟發現電影公司重金禮聘完佢，就冇錢安排工作人員同臨記，天王巨星華仔被迫紆尊降貴一腳踢。
華仔難忘上船後先覺受騙，佢話：「上船後才知只有幾個演員，其他甚麼都沒有，工作人員都得幾個。」兩星期船上開工，華仔竟要落手鋪攝影機的路軌，仲要做場務邀請船上遊客做老臨，佢又話：「有場舞會戲，所有人都是我在外面拉的，沒有一個臨記，沒想到他（電影老闆）把錢全給了我變成這樣。」華仔話結果拍完上岸，佢開P答謝工作人員嘅辛苦，全程接受佢嘅黑臉。
被杜琪峯大罵
華仔過往拍戲同唔少有才華名導合作，佢大爆杜琪峯會因為佢做得唔啱破口大罵，華仔不介意因為咁NG，佢認同導演同演員間溝通好緊要；而王家衛就試過嫌華仔嘅戲太完美，要佢重拍，華仔話：「佢話太完美不是我需要，我需要找到缺點的。」
以工作做話題，華仔可以無所不談，但講到失戀傷痛，佢就答得小心翼翼，嘴邊全程避談舊愛喻可欣嘅名字，睇嚟都怕一提開咗，腦筋轉數快嘅小S必定問到佢口啞啞。華仔又直認享受畀人讚帥哥，不過當小S講到另一天王黎明，近年心廣體胖，華仔就封口避談。