打風日子，露宿者更慘，社區組織協會（SoCO）噚晚起一連兩晚，出動到油麻地探露宿者，希望佢哋接受社工幫忙，或者喺颱風期間入住避風中心，有瓦遮頭，唔使風吹雨打咁凄凉。
SoCO更會派月餅畀露宿者，大家稍安毋躁唔好噓，心意心意啫，如果10月都係拜年時，農曆九月派月餅，有乜所謂？SoCO幹事吳衛東話，月餅係有心人捐出，既然未過食用日期，無謂浪費食物。阿東話部份露宿者可能因為要一早起身返工，怕入住避風中心會唔知醒而遲到，所以即使打風都寧願繼續瞓街，SoCO人員會勸佢哋入避風中心，因為風雨交加，露宿街頭好危險。今年寒流可能提早來臨，SoCO呼籲大家如果想捐寒衣，可以早啲聯絡佢哋，令有需要人士可以快啲有厚衫過冬。