鴻運乳豬大家食得多，原來要片呢塊2mm薄嘅乳豬皮都好有技巧。今次有請海景嘉福酒店行政總廚梁輝雄示範片乳豬。片乳豬前要將燒好嘅乳豬打戙企，師傅就會由乳豬頭位置打橫切開表皮，約2mm深，跟住就沿兩邊打直成長方形。完後分成四幅大小相若嘅長方形，做成田字形，之後就將皮片出嚟，片時要好小心，因為啲皮好脆好易爛。片完後，就要每塊平均咁切成6小塊，一共24塊，每人2塊啱啱夠一圍啦！
沿頭開
先從乳豬頭開始打橫切開，再沿兩邊直落腳，並成四塊大小相若嘅長方形，片出。
片走肥膏
附在皮上的肥膏，可用刀輕輕刮走。
切片重鋪
將每塊長方形平均切成6小塊，再鋪回乳豬身上，即可。
