隔牆有耳:湯家驊想戰區選先面試 - 李八方

隔牆有耳:湯家驊想戰區選先面試 - 李八方

公民黨大狀湯家驊一直對「超級區議員」議席興趣十足,上周率先獲新東支部通過,批准佢參選明年區議會選舉,力爭入場券,據知熱門落腳選區為沙田第一城。
雖然湯大狀踩「行」油,頻頻落區工作,點知近排卻被黨魁余若薇一盆冷水照頭淋,余若薇表明唔鼓勵黨內直選議員參選「超級區議員」,又話執委會批准湯大狀出選機會好微。
黨魁唔撐,湯大狀近排再收到噩耗,就係若要參加區選,要先經黨內面試。湯大狀坦言,之前參選立法會都唔使面試,若然選區選要面試,要先補習吓面試技巧,皆因佢冇經歷面試幾十年,上次面試,已經係1972年向扶輪社申請獎學金去英國讀書嗰次。