花旗國經濟插水，總統奧巴馬同班民主黨議員個個做晒箭靶，但喺呢個風頭火勢嘅時候，竟然仲有人雪中送炭噃﹗到底邊啲友仔咁有吉士？咪就係國際大鱷索羅斯兩仔爺同一班學生哥囉！
「大索」撐民主黨唔係秘密，但原來個仔都好有心！根據花旗國民間政治調查機構CenterforResponsivePolitics所做嘅調查顯示，原來索羅斯嘅24歲囝囝亞歷山大（AlexanderSoros），喺今個國會選舉周期總共捐咗7.38萬美元（約57.56萬港元）畀民主黨陣營，係「學生」屆別中出手最闊綽嘅一個！
咁「小索」係咪純跟老竇衫尾無意見o架？「雖然我唔係好滿意民主黨嘅表現，但我仍堅信由佢哋揸旗，對美國同全世界都係好事！」咁聽落佢應該唔係被迫o架喎！
撇開「小索」，個調查又發現，學生哥原來偏愛民主黨，至今已經捐咗42.8萬美元畀佢哋，而共和黨得嗰1.8萬美元，點止輸成條街，直頭輸到無影。而10個捐錢超過3萬蚊美金嘅紈絝子弟，亦只係得1個捐畀共和黨，對前後欄着晒火嘅民主黨嚟講，真係飲得杯落喇﹗