添馬艦新政府總部佔地廣闊，「吉」位多唔好睇，政府今年4月公開徵集藝術品，挑選本地創作藝術品日後擺放，共收到326件作品。高官同專家揀咗30件入圍作品，下月6日至24日在香港藝術館一樓大堂畀市民睇辦，市民睇完可發表意見，據講高官會參考民意，明年1月拍板。
八方噚晚上網睇過30件入圍作品，睇完多件大作，唔敢班門弄斧講意見，只係對其中兩件有較深印象；其中一件係名為「Apple」嘅綠色大蘋果，八方個人好支持有個大蘋果放在政府總部，至於官府有冇芥蒂，好難講。另一件唔係八方杯茶，但卻啱晒長官心水，就係一個「錨」（圖），八方暫時諗唔到有乜理由高官唔選擇呢件傑作，原因大家都知，八方慳番，寫少幾個字。入圍作品喺呢個網站 http://www.lcsd.gov.hk/apo都有得睇。