由「小飛象」變為「跑唔郁嘅大笨象」、今年股價冇乜移動嘅中國移動（941）前日派第三季成績表，表現無驚又無喜，但係貴為大藍籌，放榜後各大證券行自然要交功課（研究報告是也），而噚日成堆研究報告中，得里昂同高盛將中移動TP（目標價）調高，其中又以里昂個份最醒神──「TP由94元人民幣上調到106元人民幣」﹗無錯，係人仔而唔係港紙﹗計埋滙水，即係差唔多成123蚊港銀，同噚日收市價81蚊比較，大大話話有成五成水位，如果無寫錯嘅話，就係全行最牛預測﹗
即係咁，中移動係用人民幣埋數，但喺香港掛牌又未回歸A股，寫嗰兩位仁兄咁快用人仔計TP，莫非佢哋知道咗啲「不能說的秘密」？
講開又講，佢哋份報告用咗「Lordoftherings（魔戒）」為題，照華華揣測，中移動一定係佢哋心中嘅瑰寶，話唔定寫嗰陣，兩位嘅心入面仲會狂叫住「myprecious、myprecious」㖭﹗