人行突然加息，全球多個股市被震散，但係內地股市報升收市，反映啲乜？加息並唔係加息周期嘅開始。花旗係咁向中國施壓要人民幣升值，開展加息周期即係叫更多錢流入，豈非自殺？睇番加息嘅時間揀喺G20開會前，應該係貨幣戰嘅一着棋，同加息周期冇關。
港股跌207點，成交過千億，恒指守住10日線現陽燭，大成交係利好唔係利淡。
財險C輪25386：中國財險（2328）噚日報收11.82元，升2.4%。股價早幾日上試12元後回落，調整兩日成交縮，噚日破腳穿頭炒上，大成交破旗，最高見過12.04元，借加息利好炒上先睇14元，可以諗吓隻C輪25386。隻輪現價19.8仙，2011年8月3日到期，行使價12元，溢價18.3%，引伸波幅48.6%，槓桿率6倍（有效3.4倍），正股升上14元，25386睇34仙，升幅有7成，正股跌穿11元就沽咗隻輪。
俊樺