史上最強嗰條「鮎魚」游近香港，但因游蹤似近還遠，搞亂好多party！好似由國開行夥拍金管局搞嘅「人民幣離岸業務發展研討會」，開幕致辭嘅重頭戲嘉賓─人行副行長胡曉煉（圖），學咗條「鮎魚」咁唔知游咗去邊，放咗大家飛機，變成只得金管局總裁陳德霖膽拖國開行董事長陳元撐場！
有老友同華華講，呢壇「人仔派對」張請柬，主禮嘉賓寫明係7月底先嚟過香港簽署人民幣修訂清算協議嘅煉姐o架！之不過冇咗煉姐，呢壇嘢依然極度人強馬壯，有上星期出席完北京TMA論壇嘅人行貨幣政策二司司長李波、剛喺招商局退休嘅董事長秦曉、前國務院總理朱鎔基個女（中銀香港助理總裁）朱燕來……最搞鬼係成壇嘢竟然罕有咁開放畀傳媒出席！唔通係因為煉姐唔到，唔使護駕，所以可中門大開乎？