繼美國股神畢菲特講番自己做過最老襯嘅投資之後，CNBC「老襯系列」第2集前晚出街，輪到債王格羅斯同大家分享吓佢啲嘢！債王話，喺1975年嘅某日，當時仲未發迹嘅畢菲特同副手芒格嚟搵佢，諗住借10球美金（7800萬港元）將巴郡發大嚟搞；點知，佢見畢菲特間廠仔噏噏耷耷，賣衫賣糖又賣郵票，騎騎呢呢咁款，所以叫股神過主，結果，俾PIMCO母公司PacificMutual冷手執咗個熱煎堆。
嫌噏耷唔借 錯失筍刁
咁啱喺一個禮拜後，沃爾瑪嘅創辦人沃爾頓亦嚟搵佢幫手，想借錢將業務發大嚟搞，仲邀請佢去遊車河兼巡視業務，但沃爾頓沿途掛住同自己隻狗玩，加埋又樣衰衰，於是佢又送多個檸檬出去。
過咗冇耐，又有一間叫Itel嘅公司嚟借錢，呢間嘢嘅寫字樓豪到不得了，坐擁高層靚景，對正三藩市地標金門大橋，咁佢心諗今趟實冇走雞啦，就借咗500萬美金畀Itel，點知間公司竟然喺6個月後極速破產，佢嗰5球即時灰飛煙滅！
債王話，錯過咗呢兩單超級筍刁兼要輸錢後，就告誡自己唔好睇門面嘢，要注重內涵，不但將摩通創辦人摩根嘅金句「借錢畀人唔係睇佢有幾多錢同幾多樓o架！」立為座右銘，更喺自己office掛起摩根幅相嚟警醒自己。所以呢，後生仔戇居唔緊要，連戇幾鑊都冇問題，戇吓戇吓可能仲發呢！
李華華
mailto:[email protected]