神級LeicaM9Titanium　鈦貴

玩相機嘅邊個唔想擁有部Leica？如果D-Lux5或V-Lux2曾是你夢想，或許你個夢要再發大啲；Leica將推鈦金屬版——M9Titanium，全球限量500部，估價要成20萬!絕對屬神級相機。

記者：符樂
攝影：伍慶泉
Model：KammieLam@Zmodel

跟機配件十足

M9鈦金版咁矜貴，配件都特別唔同。相機右方的小圈，是創新的相機帶設計，只需一個繫點，讓手指穿入便可緊握相機。也許小記的手指較粗，穿過手帶後，手指便沒空間郁動，未能領略緊握的感覺，認為是裝飾成份居多。論實際，將手帶換上長頸帶便實用得多了；若嫌唔夠特別，仲可以選擇牛仔皮肩套，將相機掛在身上，但感覺上有點似選美小姐的彩帶。配件還包括講述M9鈦金版的書，內容包括：誕生過程、設計的演進及設計師專訪等。

■整盒M9鈦金版，從外到內都極具收藏價值。

融入汽車設計

話佢係神級，原因是全球限量500部！據Leica香港代理估計，機價可能要20萬！整部相機設計，交由Volkswagen的首席汽車設計師Walterde'Silva操刀。設計上摒除方形線條，一切以圓為主，以往M9兩側的接駁位亦被取消。相機邊緣的皮革，更與Audi豪華車內的皮革相同！叫得Titanium都估到佢同鈦金屬有關，肉眼所見銀銀灰灰、外露金屬部份，都是用鈦金屬所製造，真係從機身到鏡頭無一不鈦。鈦的好處在於輕巧、強韌、耐用，但對相機來說，M9鈦金版絕對稱不上輕便；配原裝LeicaSummilux35mmf/1.4鏡頭；獨特的遮光罩，邊緣留有四個縫隙，更令人聯想到汽車胎軨。