被質疑未有捍衞港台編輯自主嘅廣播處處長黃華麒，近日傳出佢明年2月約滿後唔續約嘅消息。麒叔噚日現身上海世博香港周，自然被追問，但佢只係話廣播處長嘅去留由政府決定，適當時會宣佈，目前佢會做好每一天，做好香港周，冇考慮前面嘅日子。
當被問到67歲嘅佢，身體狀況會唔會成為佢去留嘅因素時，麒叔就以揸車做譬喻，話架車行得耐，都要唧吓油抹吓火嘴，之後先再踩油。有指麒叔上星期主動同港台員工講，自己心臟血管塞咗，唔知係咪為離任鋪下台階。噚日佢又咁講，唔通真係同港台拜拜？商務及經濟發展局發言人就話，廣播處長合約訂明續約條款，稍後會有公佈。