又話歐聯係世界最頂級球會盃賽，周二晚連場大戰係好多波入，但4支強隊車路士、皇家馬德里、阿仙奴同拜仁慕尼黑，噚晚都贏波彈出，3戰全勝出線在望！
阿仙奴大勝3場轟14球
周二進行E至H組第3輪比賽，無獨有偶都產生9分榜首隊。最威係阿仙奴，喺H組主場大勝薩克達5:1，桑治、拿斯尼、韋舒亞同查馬克各建一功，傷癒復出嘅隊長法比加斯都射入12碼；為薩克達破蛋嘅伊度亞度達施華上季仲打緊阿仙奴，即係新、舊「兵」包辦全部入球。而查馬克原來連續６場歐聯入波，破咗紀錄。
阿仙奴唔止3戰全勝穩出線，累積14個入球更係歐聯分組賽攻力最強（未計周三戰果）；阿仙奴下周日喺英超作客曼城，領隊雲格話今場大勝可以幫球員建立信心㖭！
車路士亦唔失禮，就算有杜奧巴同林柏特等因傷病缺陣，但仍然由施哥夫同安歷卡入波，作客2:0擊敗莫斯科斯巴達。車仔3場入8粒，入球量唔輸蝕。
阿仙奴、車仔靠攻，皇馬就靠守；主場對AC米蘭，好快由基斯坦奴朗拿度同奧斯爾1分鐘內各建一功領先2:0。
皇馬贏AC3戰冇失波
AC唔係冇攻勢，但派路嘅罰球、羅賓奴嘅射門都畀卡斯拿斯救出。皇馬教練摩連奴當然風騷，朗拿甸奴退下火線時，摩佬仲主動搵佢擁抱；皇馬又係3戰得9分，叻就叻在未失過波，皇馬開季10戰不敗，摩連奴成皇馬史上最強新任教練。
踢波除咗靠攻守外，其實最緊要有運。拜仁呢晚就行大運，主場對克盧日先失守，但克盧日竟然有卡度同彭連各擺一個烏龍，拜仁自己冇入波都已經反先2:1；下半場克盧日後衞解圍，又反彈馬里奧高美斯隻腳入網，就算克盧日最後追番一球，拜仁仍然贏3:2，3戰全勝。
睇番呢4組形勢，之後唔係冇好戲碼，睇吓阿積士惡鬥AC，或者羅馬有冇機會爭番上嚟，都叫有啲話題o架！