人行前晚失驚無神加息0.25厘，華華即時打個凸，除咗因為周小川冇幾耐之前先講過今年唔會加息之外，另一個原因，係人行加息唔係0.27厘起錶o架咩？何解忽然打斧頭？莫非人行三年冇加過息，唔記得規矩？
原來呢個咁微細嘅問題，唔單止華華一個發現，仲有美銀美林，同埋萬千內地網民！內地班網民點睇呢單嘢？有人話：「以前銀行計算系統只能算整數，現在會計算小數了！」有人幫佢解畫：「國內銀行計息是按一年360日計算，每次加息0.27厘或0.27厘的倍數，恰好能被360整除。」
咁講有唔少抽水成份，而華華認為最有見地嘅，莫過於「與國際市場接軌」嘞！查實中國已晉身全球第二大經濟體系，無論經濟模式、會計、法律等各方面都逐步西化，家連利率都國際化埋，勁！