老牌官校庇理羅士女子中學（BPS）創校120周年，套綠色校服裙幾經時代考驗，早期吊帶校裙俾人笑係「青蛙衣」，不過舊生會主席林麗儀話搞錯晒，條綠色裙加埋白恤衫，倒轉嚟睇似棵小白菜，正菜嚟o架。
幾十年前着過「青蛙衣」嘅學生妹，家陣都係熟女咯，其實戰前BPS校服係黃色長衫，戰後轉為綠色，「小白菜」喺上世紀50年代面世。林麗儀大讚「小白菜」設計實用，女生平時着運動短褲打底，打波時只要除低兩條吊帶就可以剝「菜葉」，方便快趣。
但「小白菜」有個弊病，就係成日「跌帶」，令大家閨秀好尷尬，因此70年代初一度改革，推出白腰帶連身裙，點知學生認為冇「小白菜」咁方便兼肉酸，覺得新不如舊，因此連身裙只曇花一現。其後「小白菜」推出改良版，加闊肩帶，冇咁易跌帶，女生好受落。
BPS女生係智慧型，校長何鳳屏、舊生會校慶籌委會主席王羅桂華同林麗儀深表認同。舊生有徐濠縈同「上等人」梁舜燕，都係BPS出品。