美國印第安納州之私立聖母大學係天主教大學，在美國十分有名，其美式足球隊更聞名全美，印第安納州有三間名氣大學，即係聖母、印第安納（州立大學，位於Bloomington），另外有普渡（Purdue），以捐款人JohnPurdue為名，亦係州立大學，普渡一位日本裔教授攞咗今年諾貝爾化學獎三分之一。三大鼎立，令印第安納州成為美國一個重要學術州份。
聖母大學與香港中文大學有學生交換計劃，前中大校董會主席鄭維健醫生係聖母嘅著名校友，在鄭醫生出錢又出力之下，中大與聖母每年都有學生互訪，大約係聖母學生到中大讀一個學期，中大學生到聖母讀一個學期以至一年，由鄭醫生捐助成立嘅基金資助部份學生使費；此外，由今年開始，聖母大學向大中華地區學生提供三個獎學金，每個總數高達二十萬美元，足夠完成四年大學課程，其中一個係由李嘉誠基金會捐出嚟嘅。
大學教育對提升一個國家嘅政治、文化、社會建設，促進經濟發展，極其重要，奧巴馬總統最近不斷公開講，即使要削減公共開支，教育經費仍然會有增無減。喺十月五日，白宮仲搞咗一個「社區學院高峯會」㖭，對美國社區學院教育打一支強心針，由副總統拜登嘅太太主持，拜登太太Jill係社區學院教師，素來認為社區學院提供嘅教育機會，不容忽視。美國政府會在未來四年撥款二十億美元，每年五億，支援社區學院，蓋茨基金亦都每年捐出三千五百萬美元，共捐五年，畀社區學院競逐（competitivegrant）。唔好以為社區學院一定係同本州嘅大學掛鈎嘅，如果勤力讀書，成績好，社區學院畢業生（副學士Associate）可以申請入讀私立大學，左丁山就知道一啲學生從Foothill-DeAnza畢業後，轉學（transfer）入咗聖母大學、南加州大學、以至史丹福大學。
今年特首施政報告中，特別照顧到本地社區學院學生，第137段講明逐年將增加二千個（加到四千個）大學高年班學位畀副學士升學，涉及新增支出十億元。呢個係好消息，對就讀副學士嘅學生好有鼓勵性。