出嚟打工，打工仔普遍嘅心態都係做好本份換取合理回報，做到俾人炒就梗係唔好啦；不過喺職業足球世界就比較特別，好多領隊都唔介意俾人炒，因為球會嘅賠償往往好甘。亦因為咁，英冠下游球隊米杜士堡領隊史特根竟然願意自動辭職兼撕爛埋份合約，一個仙都唔使球會賠，都算有骨氣。
「佢一個仙唔收就走」
前英超球隊米堡降班後一直未好過，喺接近一年前會長傑臣炒咗領隊修夫基，換上前曼聯名宿兼帶些路迪有聲有色嘅史特根掌帥，原本希望可以令球隊重拾光輝。雖然，史特根領軍後買人冇手軟，並引入咗9個蘇超、蘇甲球員（見附表），好似格拉斯哥流浪嘅前鋒奇雲湯臣、些路迪前鋒史葛麥當奴同中場巴利笠臣等，好明顯係想將隊波蘇超化。
可惜，弊就弊在米堡連成績都好似蘇超水準咁不斷下降，喺史特根麾下，米堡喺46場只係勝出13場，未計周二對諾定咸森林嘅聯賽，目前得11分排20位，難怪球迷失望之餘，史特根亦面目無光。
終於周二佢同傑臣詳談過後，史特根決定辭職，仲唔要球會賠償，難怪傑臣亦大讚呢個前蘇格蘭名將。傑臣話：「過去幾個月我哋一直就球會嘅問題開會，而史特根一直為球會勞心勞力，喺今日我同佢傾完後，佢就提出辭職，仲撕爛張合約，令球會唔需要賠償畀佢。佢一個仙都唔要就走，實在可敬。」
斟前些路迪教頭過檔盞搞
不過又有口痕友話，史特根都唔知係唔係已經搵到好路數，所以連錢都唔要，立即跳船。又有人話曼聯名宿教波個個都麻麻，好似白賴仁笠臣、堅尼、布魯士同曉士等。無論如何，喺史根特離隊後，目前接替米堡嘅大熱，係前些路迪領隊莫比利。不過，既然史特根係因為令球會蘇超化失敗而掛冠，家兜咗個大圈又要前蘇超領隊帶隊，加上目前米堡有好幾名前些路迪球員，就係不滿莫比利而投入史特根嘅懷抱，如果米堡真係搵莫比利，咪盞搞？