已故政協常委徐展堂名下北海集團一向好低調，佢細佬徐蔭堂更加絕少喺公開場合露面，但噚日徐蔭堂忽然喺鄉議局現身，原來要支持多年老友、即係鄉議局主席劉皇發。
北海有做油漆生意，好多人用嘅菊花牌油漆係北海產品，徐蔭堂向鄉議局新大樓捐助價值30萬元嘅油漆物料，鄉議局原定舉行捐贈儀式，但徐蔭堂想低調啲，結果取消埋。徐蔭堂話北海經常有捐錢做善事，只係冇大鑼大鼓啫，至於會唔會捐助關愛基金，徐蔭堂笑笑口話邊度輪到佢。
發叔同前高官廖本懷係北海集團第一屆董事會成員，難怪同徐氏兄弟咁friend。英皇娛樂老闆楊受成都非常畀面發叔，早前亦捐出50萬元畀鄉議局建造新大樓。