假如華華呢排有機會見到新世界發展（017）主席彤叔，第一句一定唔係問「你捐幾多億俾政府個關愛基金呀？」而係「彤叔，恭喜你就快做太爺，四代同堂喎，粒曾孫幾時出世呀？會唔會請我食紅雞蛋呀？」
華華剛收到風，彤叔位長子嫡孫鄭志剛（Adrian），將會喺今年底升呢做爸爸！咁佢阿爺彤叔同阿爹鄭家純（純官），就分別升呢做太爺同阿爺，真係恭喜哂！。而華華更佩服係Adrain精力過人！
乖孫鄭志剛結婚未夠一年
唔係講笑，Adrian舊年11月先同Jennifer結婚，而喺過去呢11個月裏面，Adrian係不停咁周圍飛嚟飛去睇實新世界同周大福嘅生意，估唔到，佢嘅生產大計絕無因而被拖跨！不過，就算咁大單喜事都好，一向低調嘅Adrian繼續低調，尤其係唔想引嚟傳媒追訪，影響太太安胎，所以成單嘢無乜人知。
仲記得年過80嘅彤叔，舊年喺Adrian結婚嗰日，講到明想快啲抱曾孫，希望佢哋生夠一支足球隊咁話，咁Adrian今年31歲，Jennifer先至29歲，呢條生產線仲有大把capacity，一隊足球隊就可能誇咗啲，但係一枱麻雀應該毫無難度喇！
李華華
mailto:[email protected]