楊千嬅、林峯同周秀娜主演嘅電影《抱抱俏佳人》前晚喺尖沙嘴首映，丁子高同丁媽媽一早低調入場，但首映後嘅派對千嬅冇去，由丁子高代妻撐場。
婚禮交老公安排
千嬅同丁子高12月補擺喜酒，首映時演員抽幸運牌，千嬅抽到「三年抱兩」，佢即刻問麥玲玲：「師傅得唔得o架？」麥玲玲話：「得，你兩年抱三都得。」36歲嘅千嬅坦白話：「你知唔知我乜年紀呀？」後來又安排佢拋花球，拋中地下嘅數字即代表票房有幾多，點知佢拋咗出界。鄭丹瑞又公開話丁子高到咗上咗三樓，千嬅聽見好開心話：「咁高咁恐佈？我唔知佢嚟喎。」
事後千嬅話本來做完演唱會要派帖，點知要工作，婚禮嘅嘢要交畀老公負責。問佢老闆林建岳有乜表示？千嬅話：「佢好似有新樓盤，二手樓我都唔介意，嫁女梗要嫁妝啦。」
同奶奶住感幸福
會唔會再瘦落去？千嬅話：「唔使啩，但我瘦咗有廣告搵我，但我唔想咁大壓力，同埋唔應該歧視肥人，所以推咗。」佢又話家同奶奶住，有乜事爆水渠等都有人處理，覺得好幸福。丁子高就話睇戲見老婆同林峯親熱就玩電話唔敢睇，仲話下次老婆有親熱戲佢唔會睇。
