【本報訊】油麻地一對菜檔姊妹花，昨遇上兩名姨甥奄尖女顧客，兩女揀菜不僅「彈菜唔夠靚」，又左揀右挑。姊妹花被激至趕客，引起兩女客不滿；四人初則口角繼而混戰，最後四女涉襲擊被捕。其中兩女客及菜檔「細妹」分別眼、臉及手腳受傷，三人需送院敷治。
指兩女客神憎鬼厭
現場新填地街近北海街街市，其中一個菜檔由朱姓姊妹花（分別37及33歲）打理；菜檔東主朱老先生經營多年，退休後由兩女兒接手，一直做街坊生意。昨上午11時許，67歲姓張婦人與30歲姓趙姨甥女到菜檔買菜；其間兩婦左揀右挑，又指蔬菜不夠靚。朱氏姊妹大動肝火，出言趕客：「唔做你哋生意呀」，惹起張及趙婦不滿；四人七嘴八舌發生爭執，繼而大打出手，街坊見狀勸止，姊妹花其後報警求助。
警員到場以涉襲擊將四人拘捕，其中朱妹臉傷眼腫；張婦及趙婦右眼及右手腳受傷，三人送院敷治，朱姊則帶署調查。事後朱父接獲通知趕返菜檔，他指在油麻地擺檔60多年，「我哋打開門做生意，幾十年嚟冇同人打過架，家係佢哋兩個人（張及趙婦）捉住我個女係咁打，搞到我個女隻眼腫晒」。朱伯又說：「唔買冇問題，但佢哋成日揑爛啲番茄，搞壞人哋啲嘢就唔啱！」
鄰檔賣生果鄧先生說，涉事件兩姨甥相信是新移民，經常在檔口左揀右揀，態度奄尖：「佢哋可以揀好晒入晒膠袋，之後又嫌貴唔肯買」。鄧指有人常用普通話說：「這麼貴，不要！」在街市的檔販均指兩姨甥神憎鬼厭。