以前小童只去屋苑附近的遊樂場玩，現今獨生子女夠矜貴，家長多嫌街場又雜又污糟，又希望他們多點時間學習。所以近年新興室內遊樂場和Playgroup，不但乾淨衞生又有專人照顧，還可以從娛樂中學習各種技能。
記者：林佩婷
攝影：林栢鈞、部份相片由受訪者提供
度身訂做Playroom
專為0-8歲設計的Wise-KidsPlayroom，佔地8,000呎，內裏分成八大區域，鼓勵小朋友從遊樂中學習。負責設計有關遊戲的場地顧問Bennie，說室內遊樂場好處多多：「政府起嘅公園遊樂場，其實無咩設施俾小朋友盡情玩。呢度遊戲多元化，可提供教育性規劃，而且喺室內唔怕打風落雨，就更方便。小朋友來到這裏可以模仿同觀察學識點去玩，從而加強自信心、遊戲、社交技巧。」
Bennie更說八個不同性質的遊戲區，照顧到各個年齡的小朋友。「適合3個月至2歲半的「幼兒天地」，周圍的設計配合剛識爬或行得跌跌撞撞的BB和小朋友，別以為3個月沒東西可以玩，特大水床可安放BB加強觸感，設計玩具都大大件、物料特地度身訂做，軟綿綿不怕撞親。另外更有他們最喜歡的波波池、中空圓筒扮過山洞，還有推車仔等。入門還設有欄柵，不讓大一點小朋友進入，更加安全。「建構樂園」裏有各類積木和組件，玩的時候可訓練手眼協調和空間感，最重要是將散件拼湊後，可加強他們的規劃設計和創意，不少小朋友都愛砌3D模型，在此可預早學習建構規劃。孩童都愛塗鴉，「創意畫廊」就有很多材料如畫紙顏料，還有不少環保物料如紙巾桶、紙條等，讓小朋友坐定定繪畫做手工，做好的還可以放在一邊給人參觀，從而訓練創意、令腦袋更靈活。「鬼馬化妝室」內就有不少假髮和衣服，偶然更有臉部彩繪安排，從扮鬼扮馬中可以體會到不同角色，好像扮獅子的話，整個行為都要像獅子一樣，模仿得好會增加自信。「童話世界」收藏不同的故事書和布偶公仔，父母可和小朋友一起分享故事，加強他們閱讀能力和表達技巧。特定時段才開放的「感知互動世界」，入口通道佈滿不同物料的物品，讓小朋友在觸摸吓感受不同物料。另外黑暗的帳幕內有不同的感官媒介，如光、聲音等，讓小朋友置身於不同的環境，增加好奇心和放鬆身心，每次約五至十分鐘。」
場地布置月月新
別以為簡單設八個區域便完事，為了保持新鮮感，這裏每個月都會將整個場地的設計和擺放位置重新安排，場內最少有三名以上工作人員和小朋友一齊玩。衞生方面，入場前要探熱和用消毒啫喱洗手，一日四場、每場個半小時的玩樂時間後，還會加強清潔。這一切一切都由讀遊戲工作的Bennie想出來，她以前做醫院遊戲師，在英國深造遊戲設計，覺得良好的遊戲其實對小朋友很有幫助，令成長更健康、對心理和社交都更好。直至她見到Wise-Kids想開室內遊樂場，便決定應徵：「香港好少有商業機構可以租咁大地方搞兒童Playroom，不是只想賺錢而係俾家長帶小朋友去玩。為咗搵結實家具，仲特地到德國視察。咁大地方設計八大區域，各方面都照顧到，有啲媽咪甚至會喺屋企模仿某啲區域㖭！最後15分鐘，我哋會集合小朋友同家長一齊唱歌玩遊戲，不但可以學吓群體活動，亦等於有個指標緩衝，玩完就知道要講byebye。」
八大區域
家長感受
環顧整個遊樂場，最小年紀可算是Rebecca七個半月大的囡囡Clairisse，她在五個多月時媽咪已帶她來玩，最主要原因是不怕蟲咬。「試過去公園玩俾蟲咬，家感覺無咁乾淨，呢度做足消毒程序，而且呢度好多小朋友，可以嘗試同人溝通，雖然佢未識講嘢，但明顯見到佢嚟玩之後唔怕人。」
本身從事教育工作的胡小姐22個月大孫女晴晴來這裏三個月，認為這裏對小朋友好有益處：「家一星期來兩次，呢度嘅玩具可刺激思維，除學習同人相處，玩完後仲要學埋執拾，每次認識的小朋友又唔同，家佢同朋友仔溝通都ok。」
查詢：29896298
室內投籃Playgroup
屋邨的籃球場多數都被青少年佔領，有些家長更認為籃球場品流複雜，小朋友無機會落去玩。有見及此，甲子的梁教練就想到搞室內籃球Playgroup，除有個迷你球場外，還有繩網、攀石場等作體適能訓練。「好多時踢波、高球或網球有小朋友玩，但籃球場俾大哥哥霸住玩，唔多見七歲以下小朋友有得學，最重要是家長想小朋友運動，平常打機返學做功課都唔多郁動令病痛多。而且出面Playgroup唔係學語文就係畫畫彈琴，所以我就諗到開籃球Playgroup。按年紀分組教授，一歲半至三歲可能集中多少少體適能、學習身體技巧，再大少少再學拍波、步法等，再大啲就可以學投籃比賽。」
別以為學員在球場內單學打籃球咁簡單，梁教練話其實體適能同樣重要，故於周圍設置不同設備。「好似牆周邊有繩網、攀石牆，可以訓練手腳同平衡感，從攀爬過程中學識四肢郁動。樓梯有平同直梯，甚至會郁俾佢哋試驗感覺同練習抓力支撐。另外仲有唔同玩具好似大Fitball學身體唔同位置感，跌親時教佢點保護自己。佢哋用嘅波都係迷你版，到真正練籃球時，會先練跑，再練步法，最後教佢哋點打比賽。」整個籃球課不單止鍛煉體能，還可以培養小朋友的成長。好像入門就要和老師同學打招呼，學習尊師重道；練習時要幫手整理教具，玩完之後收拾；在休息時間，教練還會幫每個學生做評估報告，看看他們的溝通能力和合群性，「佢哋唔單止學到籃球技巧，仲有和別人溝通能力、合作性和紀律。」
適合活躍小朋友
陳太囝囝海量約四歲，平常很活躍，她說來這裏學習運動三個月，手腳協調明顯有進步。「我唔想小朋友學太多功能性好似語文訓練，呢度有練波跑步啱晒活躍嘅佢。比較過後覺得教練有愛心又風趣，每次玩完教練都有回應交流，知道小朋友有無進步，而非流水作業。家佢經過體適能訓練，平衡力同手腳協調都好咗。以往去公園唔敢攀鋼架，家就夠膽玩。」
至於文靜的Harley同樣參加了三個月，莫太見網上評語好就帶囝囝來玩。「本身少去公園，因為覺得好污糟，Harley本身好怕醜慢熱，以前去會所死都唔肯郁，參加完後再去第度玩會自己走來走去。」
查詢：23942933