煲呔噚日喺禮賓府舉行「咖喱餐」家宴，座上客唔係富商權貴，而係幫佢揸車嘅高級貴賓車司機歐陽成。成哥今個月底榮休，老友夠鐘咬長糧，煲呔同太太特別請佢食餐飯餞別。
司機成哥榮休
成哥喺政府服務35年，殖民地年代為洋高官揸車，做過前財政司麥高樂司機，後來煲呔升職做財爺，成哥繼續做財爺司機，十幾年來見證煲呔步步高升，升做政務司司長，到後來做特首，都係成哥車出車入。
煲呔話當年麥高樂交棒畀佢時，千叮萬囑一定要珍惜兩個寶貴資產，唔係聯滙同庫房儲備，而係財爺私人助理同司機成哥。成哥今年退休，私人助理Teresa仍然在特首辦，煲呔讚揚兩人係佢「最貼身好拍檔」。
咁唔捨得退休司機，煲呔真係一個好老闆，不過有人翻佢舊賬，指佢做財爺時，家廚于燕平投訴被刻薄，後來獲勞資審裁處判決攞到4萬幾蚊補水，思疑今次又係SpinDoctor為佢塗脂抹粉。