施政報告發表後，想話問吓知情人士鄭大班，問佢有乜背景資料可以提供，點知佢話：「呢輪好忙，要搞講座，唔得閒搵料同你講？」佢又問：「考吓你，識唔識得美國有間大學叫做NotreDame?」有冇搞錯呀？左丁山點會唔識？反問番佢：「你知唔知JoeMontana喺邊間大學畢業？」呢，鄭大班大概冇乜留意美式足球，一時之間答唔出。騎騎，蒙坦拿咪係NotreDame出身嘅最有名球星囉。蒙坦拿可能係美式足球史上最偉大嘅四分衞（QuarterBack），離開NotreDame之後參加一九七九年選秀大會，被三藩市四十九人隊選中，造就咗四十九人隊嘅黃金年代，贏咗四次超級碗。NotreDame大學（中文譯做聖母大學）嘅足球隊叫做FightingIrish，名聞全美，有不少美國中學生發夢入讀聖母大學，加入足球隊。左丁山睇過一套電影《Rudy》，真人真事改編（但有一幕係戲劇創作，假嘅），講一位成績平平（因有閱讀困難症dyslexia），體魄平平嘅學生，發憤由社區學院轉入聖母大學，最後得到一個機會在一九七六年球季最後一場最後一節，上場迎戰喬治亞理工（GeorgiaTech）嘅故事，呢齣電影（一九九三年）由SeanAstin飾演學生DanielRudyRuettiger，在2005年獲ESPN選為過往二十五年最佳二十五部體育電影之一（體育評論員評為第24名，espn.com訂戶選為第四名），在聖母大學實地拍攝，故事非常勵志、感人。
不過聖母大學唔止足球醒（近十幾年來就唔見有好表現，比南加州大學遜色得多），學術方面亦巴閉，據鄭大班講，在U.S.News&WorldReport嘅2010年全美最佳大學排名榜位列第十九名，升學指南天書ThePrincetonReview（2000）被家長選為五大夢幻大學之第四名，即哈佛、史丹福、普林斯頓、聖母及耶魯，另外大學本科生商科獲彭博/商業週刊選為全世界天主教大學第一名。香港嘅知名校友當然係鄭維健，鄭維志兄弟，鄭大班位公子入咗聖母大學，佢以家長身份，幫忙舉辦一個DiscoverNotreDame嘅升學講座，由陶傑主持，講者有該校首席副校長（Provost）及其亞洲顧問，加上鄭維志、鄭大班，於十月二十三日在港麗酒店二時半至五時舉行，有意赴美升學嘅學生，大可參加。