適逢超強颱風「鯰魚」迫近，一切都好似山雨欲來，人行突然於五中全會閉幕後經濟數據公佈前擇晒時辰出其不意加息，巴西財長又咁有「吉屎」突然話唔去G20峯會，真係機關算盡都估佢唔到，假如我係中共中央財金官員，我都會響應巴西呢個咁重要嘅貿易伙伴杯葛G20，費事兜口兜面俾人攞人民幣出嚟狂揪，令中國變成各國天敵。
講開天敵，中國家嘅處境都好似一條鯰魚。何解？北歐人好鍾意食沙甸魚，可惜沙甸魚被漁民撈起離開大海後，大多已經暈其船浪甚至魚命不保，漁民遂千方百計諗辦法如何保住沙甸魚小命。
激勵上進心
結果係，放一條鯰魚入去沙甸魚群中，鯰魚係沙甸魚嘅天敵，沙甸魚為咗避開食肉嘅鯰魚，只有本着求生本能搏命游快啲，經濟學將呢種面對外敵入侵或外來壓力而併發求生意志與戰鬥精神之現象做「鯰魚效應」（CatfishEffect）。就係因為有中國，各國更加需要發掘自身優勢尋找出路。
早幾年黃子華套「絕代商驕」都提及過呢種「鯰魚效應」；在人力資源學上，就係企業請個醒目仔返嚟引入競爭，激勵員工上進心。發揮得好就可以達到優勢互補，然而發揮得唔好，就有機會觸發為爭取表現而勾心鬥角，後果有兩個，一就係新人舊人皆同時把最好的都騷晒出嚟；另外情況，新舊兩派水火不相容，反而有礙企業進步向前。
用於零售，就好似旺區嘅珠寶店金舖開到成行成市，一旦有新丁加入戰團，各自肯定會加把勁，發揮營銷創意。用於揀股，當一個火噴噴嘅股市好似香港咁，多啲同類股份於同地掛牌一樣係好事，唔怕貨比貨，至怕你唔識貨，唔比較過又點知邊隻至係龍頭。
呢幾日龍尾股發威，中銀香港（2388）網上炒股平台又出現慢機現象，通通都係敗象凶兆，07年都試過啦，唔相信歷史會重演，或者你自命係特技人，都無人會再阻止你跳火圈。阿爺唔加息，你又點會突然清醒呢！
胡孟青
作者為獨立股評人