全球最勁颱風鮎魚殺到埋身，根據天氣預測颱風路線圖，鮎魚分分鐘直撲埋嚟吹到正，全港打工仔人同此心，不約而同試圖運用念力，希望鮎魚可以快啲嚟到，若然周末之前來襲，掛起八號風球，隨時可以多一日假期。
網民指已發功
八方作為普通打工仔，做得出就唔怕認，係，八方都有運用念力希望可以左右鮎魚走勢，然而腦交戰咗大半日，始終未睇得清鮎魚走勢，好多網民都話，李氏力場又發功嘞！
所謂李氏力場，係香港特區獨有嘅一種氣候現象，呢個超自然現象97年前唔係好明顯，回歸後威力劇增，力場影響範圍遍及全港1,104平方公里、262個離島，越接近中環政府總部同禮賓府，據講影響力越大，呢股非一般引力直通北方，遠至中南海，連胡總都吸到埋身，南下深圳握手。
香港市民以前並不察覺李氏力場存在，家卻越來越多人感受到李氏力場威力，皆因近年打風，好多時都只係掛三號風球，就算掛八號風球，都係在周末或者凌晨時分，一到天光或星期一返工前就落波，簡而言之就係打工仔冇得因為打風而有假放，唔使旨意約腳開枱或者唱K，周末節目泡湯，十分掃興。
經群眾集體智慧研究之後，覺得李氏力場並非空穴來風，而係有迹可尋，事關李超人旗下貨櫃碼頭喺打風期間要停止運作，經濟損失非同小可，如果打唔成風，就可以繼續搵錢，利益攸關，難怪好多打工仔、小市民對於李氏力場都不敢輕視，甚至深信不疑。澳門噚晚7點掛一號波，香港天文台紋風不動，有網民認為李氏力場已經發功，超強颱風都鬥唔過超人。亦有網民希望李氏力場今次有料到，因為鮎魚造成人命損失，橫掃香港嘅話，是禍不是福。
邊個贏話唔定
家陣鮎魚與超人角力，究竟鮎魚能否突破李氏力場，八方相信連天文台都說不準，預測天氣嘅超級電腦，可以與超人匹敵咩？區區一條鮎魚，超人會放在眼內咩？浮雲呀，浮雲，超級颱風又如何？即使天文台台長都係姓李，面對李氏力場，都要甘拜下風。
mailto:[email protected]