面對颱風暴雨，相信「新界王」劉皇發感受甚深。近日佢被人踢爆名下公司摩貨賺錢，唔少人認為佢應該辭去行會職務，雖然煲呔撐實，發叔暫時頂得住，不過怕且仲有下文。
行會暑期後復會，發叔唔見人，噚日露面主持鄉議局會議，會後透露曆學泰斗蔡伯勵指點佢迷津，有高人教路，發叔似乎好有信心趨吉避凶。發叔話蔡伯勵講，近日寒露風、霜降雨，10月都打風，總之都係多風雨，只要度過咗，自然無事。
發叔么女劉玉蓮幫鄉議局設計咗多款紀念品，噚日有開會介紹，之後佢話父親見慣大場面，應付呢啲事綽綽有餘，又指村代表選舉在即，不排除風雨驟來同選舉有關。發叔何時交棒，係好多人關心嘅問題，劉玉蓮話父親係工作狂，「未見佢病過」，估計冇咁容易退休，又話為鄉民做事，好多時身不由己，唔係話退就退。摩貨風波主角之人、發叔兒子劉業強噚日有現身，不過冇答任何問題。