【本報訊】08年強颱風黑格比蹂躪記憶猶新，今番鯉魚門遇上鮎魚，商戶隨時遭逢更強風暴潮。目前本港共有五個風暴潮高危黑點，包括屯門的聯安新村及嘉和里、西貢南圍、深井及鯉魚門。渠務署稱，這些地區因位處低窪，遇上風暴潮水位上升時，海水會浸過陸地，導致嚴重水浸。
「上次打風水浸，搞到我有三條龍躉游走咗，見過鬼仲唔怕黑咩。」於鯉魚門經營海鮮店陳明記40餘年的陳桃，昨晚獲悉超強颱風或吹到，頓時緊張起來，並帶記者到店舖附近的水渠出口察看：「污水經渠喺呢度流入海，但如果海水漲就會湧番入嚟，呢度變咗條河流咁。」
他說兩年前一場颱風，水更由店內溝渠湧上來，水浸及腰，「浸過地主公同個魚缸，啲魚咪游咗出嚟囉，走咗三條龍躉呀。」他說雖事前已將雪櫃等用矮凳升高，「結果幾個雪櫃都浸到燒咗，總共損失萬幾蚊呀」。
翻新渠道無濟於事
鯉魚門近海並地勢低，陳桃說，雖然當局曾派人來為部份渠道翻新，但無濟於事，因每次颱風或水漲，都會有輕微水浸，「浸到腳眼到，但已經慣咗，冇理佢。」他說強勁颱風前只好減少入貨及將貴價魚放到較高的魚缸，「但雪櫃、電泵都好難郁，望天打卦啦」。
附近的居民王小姐說，部份居民曾因颱風需在警員及義工協助下疏散，「惟有做多啲防風措施，貴重嘢咪放高啲囉」。
渠務署發言人說，當天文台發出八號颱風信號或紅雨、黑雨等警報，渠務署會啟動緊急控制中心，監察各區水浸情況，調動人手排洪，民政事務總署亦會通知當區居民，防範水浸。