繼意大利參觀林寶碳纖研發部後，跟手踩埋過英國曼徹斯特，唔係為睇曼聯，而係深入賓利廠房，直擊貴族名車出世全部過程。現場中感受到的並非靚牛皮香味，而係一個一個專業工匠，一點一滴慢工出細貨地砌出一架賓利，人味確比皮味濃。
記者：徐影龍
攝影：NickDimbleby@Bentley
與波箱「結婚」
九成廠房禁止拍攝，今番有御用攝影師跟隨，我大可蹺埋手欣賞賓利點樣全人手砌車。首次踏足英國，感覺跟歐洲大多國家有好大分野，每位男士都滲着翩翩風度，入到廠房，每人好似藝術家，全神貫注做好工作，跟你Say個Hi後，又再埋頭苦幹，絕不會出現車房仔擔煙度馬纜情況，做車房一樣可以好Gentlement。
廠房佔地相當大，走馬看花都參觀了近三粒鐘，見識到車架點樣跟W12、V8引擎及波箱結合，當地人取名為「結婚」，而最令我感動同大開眼界的，是皮料及木料需經過難以想像的加工及製作。好似車櫳皮料，以Mulsanne為例，大概需17隻公牛皮才完成，由於母牛交配後背部會破損，所以全用公牛皮製造。經揀料、染料及篩選後，再用電腦裁出最大效益的切割，分派到部件工匠手上，再逐針逐線以人手縫上。望住白髮公公縫製軚盤，每針每線都充滿感情，難怪坐上賓利時，感到靈氣仲濃烈過皮氣。
木紋百分百對稱
第二項驚喜位是木紋材料製作的超高難度。原木材選料頗多，較熱門有伯爾胡桃木、紅影木等，先揀選一棵樹最核心最靚紋理的部份後，以「刨鉛筆」方式將之切成薄片，令到每片木紋都一模一樣。工匠將之左右一併，就可形成100%對稱效果，女士們大可用「LV對花」來理解。更大面積的部件，都可有完美木紋效果，又或車門內側及椅背餐枱，左右都有相同木紋。當然工匠眼光及手法要熟練，否則弄壞一件，大有可能全批木紋飾板都唔用得，每架車都有一套20塊專屬木片，少一塊都唔成事，就算同一款賓利，車內木紋都絕不相同。
以後有機會接觸賓利，摸摸那些木紋飾板，將感受到平價車那些仿木膠板，所欠缺的獨特溫度同觸感，再想想背後有幾多工匠嘔心瀝血去製作。
精工逐Part睇
