香港人想見到應屆諾貝爾和平獎得主劉曉波難過中國人登陸月球，但如果想探望另一位和平獎得主達賴喇嘛就相對易好多，香港奇人李慨俠就同達賴握過好幾次手。上個月，李慨俠又造訪西藏流亡政府，今次佢攞咗一張好有紀念價值嘅相去探達賴。
好想敍吓舊
呢張黑白照係1958年中共18軍軍長張國華同達賴揸扒時影嘅，嗰時達賴仲未被中共尊稱為分裂分子，所以「中國戰神」張國華對住達賴仲可以笑得出。李慨俠話，當佢拎張相出來嘅時候，達賴若有所思。李慨俠話，相裏面有架老爺車，就係毛澤東當年送畀達賴嘅，係蘇聯製嘅私家車。聽講架車家仲行得，由成都一個商人擁有。
李慨俠話，張相勾起達賴好多回憶。佢老人家最記得嘅係當年嘅司機，呢位司機已經同達賴失去聯絡，至今下落不明。達賴問李慨俠，有冇可能搵到呢位司機或者佢嘅後人，好想同佢哋敍吓舊。