承接上日跌勢，港股噚日再跌288點收市，報收23469，屬高開低收格局，偏淡，但係成交大幅縮減兩成，只當技術調整睇。
港股由9月中開始一直沿住10日線推上，10日線家上到23221，同位處22706嘅20日線好近，係好有力嘅支持區，港股下調嘅空間唔大，後市會反覆向上，調整係收集大藍籌嘅好時機。
馬鋼C輪18783：馬鋼（323）噚日報收5.02元，升2.6%。股價喺幾條平均線拉鋸咗好耐，有開始炒上嘅迹象，股價突破5.20元關之後，將反覆推向6元，可以諗吓隻C輪18783。
隻輪現價7.4仙，2011年4月11日到期，行使價4.88元，溢價12%，引伸波幅48.4%，槓桿率6.8倍（有效4.1倍），正股升上6元，18783睇14.3仙，升幅接近1倍，就算升到5.80元止步，隻輪都見12.7仙，有71%升幅，正股跌穿4.75元就沽咗隻輪。
俊樺