97之後，英國政府間中仲有向香港人授勳，好似陸恭蕙咁，07年元旦獲頒大英帝國官佐勳章，即係OBE，但事隔三年，噚日個勳章至到佢手，事關咁啱約克公爵訪港，英國駐香港總領事館安排咗一個私人授勳儀式，由約克公爵頒授勳章畀陸恭蕙。
回歸後陸恭蕙淡出政壇，專心從事政策研究，做民間智囊。英國駐港總領事奚安竹就喺授勳儀式上大讚陸恭蕙透過政策研究展現出魄力同目標。陸恭蕙最近仲寫咗本書，叫《UndergroundFront:TheChineseCommunistPartyinHongKong》（中文暫譯《共產黨在香港》），噚晚舉行讀者分享會，聽聞本書遲吓仲會出中文版。