咩叫一沉百踩？踢吓利物浦同前鋒費蘭度托利斯（F托）就知。周日利物浦又輸波，喺默西塞德郡打吡戰0:2不敵愛華頓，家陣排英超尾2，係自1953年以嚟嘅最差開季成績；隊波咁沉，領隊鶴臣就梗係要搵啲嘢賴，希望明哲保身，今次犧牲品就係F托喇！
「我認為佢係欠缺信心」
平心而論，F托呢場波都幾差吓，踢足90分鐘，6次射門只得2次中龍，當然冇波入啦！英國《太陽報》只畀F托4分，同祖高爾及賴恩巴布排全場最低分，而後防孭晒鑊嘅高捷斯基同加歷查，都有5分。
鶴臣話：「F托冇傷患問題，我認為佢係欠缺信心，世界盃佢踢得唔好，就一路積落嚟球隊度。」喂！利物浦今季目前唯一英超勝仗，就係靠F托一箭定江山，以1:0擊敗西布朗喎；而且一個前鋒狀態同心理出現問題，領隊有好大責任，利物浦又唔係得一個F托識踢波，唔用佢就死晒火，你鶴臣都好大問題啦！
查實鶴臣自身都難保，8場聯賽得6分，而且輸咗4場；英國博彩公司威廉希爾，已經列佢為英超下一位被炒領隊大熱，只得2.87倍（見附表）；不過鶴臣又唔使咁驚住，事關第4熱門，竟然就係家陣喺英超排第2嘅曼城領隊文仙尼。
阿古蘭尼活得比「利」好
英國《每日郵報》仲好心水清，搵番呢幾年英超班主易手後，只得曼聯嘅費格遜同伯明翰嘅麥利殊，可以成功過度；之前嘅蘇拿（韋斯咸）、曉士（曼城）同雲尼亞里（車路士）等，都收晒大信封。紅軍新班主約翰亨利講到話對球隊上下好有信心，會畀多啲時間球隊；但美國人講嘢，希望鶴臣唔好咁天真信到十足十。
另外，今季由紅軍借到祖雲達斯嘅阿古蘭尼，就可謂成功翻生，周日主場對萊切先開紀錄、取得回流意甲首個入球，助祖記大勝4:0；我求大俠即時諗起，李蕙敏嘅經典金曲《活得比你好》。
誰是英超下位被炒領隊？
領隊（執教球隊）：鶴臣（利物浦）
賠率：2.87倍
領隊（執教球隊）：馬天尼斯（韋根）
賠率：4.5倍
領隊（執教球隊）：格蘭（韋斯咸）
賠率：5倍
領隊（執教球隊）：文仙尼（曼城）
賠率：10倍
領隊（執教球隊）：曉頓（紐卡素）
賠率：11倍
領隊（執教球隊）：曉士（富咸）
賠率：11倍
領隊（執教球隊）：麥利殊（伯明翰）
賠率：12倍
領隊（執教球隊）：莫耶斯（愛華頓）
賠率：15倍
賠率來源：威廉希爾
註：只列前8