高官圈子噚日又有調動，本身係財經事務及庫務局副秘書長（庫務）嘅梁卓文，下個月6號會接替卓永興做食物環境衞生署署長。
梁卓文87年加入政府，做過前政務總署同政務司司長辦公室等，今年只有44歲，可能係最年輕嘅署長之一，因為現任部門署長之中，康文署嘅馮程淑儀去年上任時44歲，社署嘅聶德權去年上任時45歲。
至於卓永興，噚日段新聞稿冇交代佢嘅去向。八方聽聞，因為現任商務及經濟發展局常任秘書長蔡瑩璧要退休，所以出現一連串調動，現任勞工處處長謝凌潔貞會紮職做常任秘書長，卓永興就會平調去頂呢個處長位，但係一切仲要等俞宗怡拍板，卓永興卸任之後會先放一個月大假。