自從中國消費者協會兩年前承認80%茅台酒係假嘢之後，唔少好此道者都轉飲紅酒，以免自己無厘頭中酒毒！「證券界教母」蔡太陳葆心就係其中一個，之不過最近，蔡太終於有機會飲番杯「正」茅台，仲飲到俾人踢入會㖭！
蔡太前晚喺屋企搞局，華華有幸做座上客，難得老友聚頭，主人家毫不猶豫咁拎支私人珍藏嘅「正」版貴州茅台出嚟與眾分享。一向嗜嗒兩杯嘅蔡太話，呢幾年怕飲到假酒，就連茅台都唔敢掂，不過最近就訂咗6支貴州茅台，而且仲係保證支支堅嘢㖭！
老友聚頭 鵝肝佐酒
啲酒點嚟？話說蔡太有日同個商家老友一齊食飯，對方知道佢鍾意飲茅台，於是爆畀佢聽香港有班茅台忠實擁躉，為咗要飲到真正嘅茅台，就成立咗一個飲茅台私人Club，呢個Club會直接向茅台總廠訂酒，講咗咁耐，蔡太最後梗係俾人踢埋入會啦！佢仲即刻落柯打訂左6支，不過由於同道中人真係太多，所以最後佢只獲配給3支，每支盛惠6千幾銀，抵飲！
咁，有美酒又點可以冇佳餚。蔡太嗰朝一早起身，撲咗去西營盤賣潮州滷水食品出晒名嘅潮州舖生記，買咗啲鵝肝畀華華試，咁呢啲又幾銀呢？蔡太話有錢都買唔到o架，事關個老闆只會將啲靚嘢賣畀「架己冷」。唔知華華踩落去嗌聲「阿值」（即係潮州話阿叔、uncle之類），會唔會買到呢？
李華華
mailto:[email protected]