現時市面有不少內地品牌的電器發售，電器店或承諾提供保養服務，惟須留意應在單據列明保養安排。有讀者在DSC德爾斯購買一部內地品牌電視機，不足一年出現故障，DSC以代理商結業，沒零件為由未能跟進。
劉先生去年7月25日於DSC旺角始創中心分店，以3,990元購買一台ICON37吋LCD電視機，享一年免費保養。今年7月18日該機故障未能開啟，他聯絡DSC，獲覆該機代理已結業，缺乏零件維修，不會跟進。
劉先生氣憤地說：「買機時DSC職員明明話由該公司負責一年保養，家又話代理執笠冇零件維修唔到」。劉遂向消委會投訴，DSC安排收機維修，並承諾約兩星期後可取機，但一個月後仍未修妥，他致電追問，DSC又以代理結業為由，聲稱不會再跟進。
DSC回覆，由於ICON電視機的代理商匯天創建有限公司突然結業，以致無法履行一年保養承諾，「我哋都唔知佢幾時執咗」。DSC表示，曾嘗試將該機轉介其他維修商代為檢查，但因欠缺原廠零件以致無法進行修理。「我哋只係同代理攞貨，唔知邊度有零件」。
DSC破例換另一品牌
DSC又稱，保養由代理商負責，維修卡上印有代理地址。「如果部機壞咗，咁我哋建議顧客搵其他維修公司或者去鴨寮街，我哋一般會畀個特別折扣個客，買過部新機」。現基於與客人保持友好關係，破例批准無條件更換另一品牌的同一尺寸LCD電視機。
消委會今年首8個月，共收到1,241宗電器買賣投訴，當中逾3成涉及維修保養。該會發言人提醒，除考慮電器的質素及性能，也要留意保養及售後服務，「要注意邊個負責提供保養，有冇成個團隊負責維修同上門服務。買電器唔止買部機，售後服務都好重要，如果呢頭買嗰頭間公司就執咗，就等於冇售後服務」。
檔案編號：0910055
內地水貨多無保養
電子通訊技術人員協會理事長楊健雄指出，在港有不少內地品牌電器出售，多屬水貨，不享保養服務，「如果冇保用證，又冇得喺網上登記保養，應該就係水貨」。有零售商聲稱會替該等產品提供保養服務，他提醒消費者應要求商舖在單據列明保養承諾，「舖頭話自己負責保養，又唔喺單據寫明，就最容易出事，個推銷員之後可能唔認又或者離咗職，顧客就損失」。
楊健雄又指出，現時有不少電器的保養維修服務沒有保證，「好多細公司喺工廠大廈租個房仔就話係維修部，做好多雜牌子嘅代理，有啲一人公司都叫代理，法律上冇問題，提唔提供到實際服務就好難講」。如市民着重電器售後服務，他建議選購較知名品牌，「唔敢話細牌子嘅售後服務一定差，但一定唔及大牌子」。
社會服務
◆報料熱線︰29290000
◆社會服務熱線︰29908288
◆蘋果日報慈善基金︰29908688
◆電郵︰mailto:[email protected]
◆傳真︰37112468
◆網上捐款︰ http://charity.appledaily.com.hk/donate
◆各類表格︰ http://charity.appledaily.com.hk/forms
匿名投訴恕不處理。一經投訴，本報保留刊登權利。